बेलायती बालबालिका संसारका अन्य बालबालिकाको तुलनामा बढी अल्छ्याहा रहेको अध्ययनले देखाएको छ। उनीहरूले दैनिक दौड, कसरत लगायतका कार्य नगर्ने अध्ययनमा देखिएको हो।

विश्व स्वास्थ्य संगठन (डब्लुएचओ)ले हालै प्रकाशित अध्ययनले मध्यम वर्गीय परिवारका बालबालिकाहरूले बढीजसो स्वास्थ्यप्रति सचेत देखिएको छ। गरिब परिवारले भने यसमा उति ध्यान नदिने पनि अध्ययनमा देखिएको छ। ४४ देश सहभागी उक्त अध्ययनमा ११, १३ र १५ वर्ष उमेर समूहका युरोपेली, केन्द्रीय एसिया तथा क्यानडाका बालबालिका सहभागी थिए। बेलायतका चार हजार बढी बालबालिकाले सर्भेमा भाग लिएका थिए।

अध्ययनले बेलायतका १५ वर्ष पुगेका ११ प्रतिशत केटी र १६ प्रतिशत केटाले मात्र दैनिक ६० मिनेटको शारीरिक अभ्यास गर्ने गरेको देखिएको छ। त्यसमा हिँड्नु, साइकल चलाउनु र रोलरब्लेडिङ गर्नुपरेका छन्।

उस्तै अल्छ्याहामा रोमानिया, पोल्यान्ड, स्लोभाकिया, स्पेन, स्विडेन, नर्वे र क्रोएसियाका बच्चाहरू पनि रहेको परेका छन्। हेल्थ बिहेभियर इन स्कुल–एज्ड चिल्ड्रेन शीर्षकको यस अध्ययनमा बेलायतमा लामो समयदेखि बालबालिका शारीरिक गतिविधिमा कमजोर देखिएको हो।

पहिला बालबालिकाहरू घरबाहिर बढी समय बिताउँथे, अचेल भने त्यस्तो गतिविधि हुन छाडिसकेको छ। आउँदा दिनमा यस्ता गतिविधि अझ घट्ने भएकाले भोलिका दिनमा स्वास्थ्यसम्बन्धी समस्या झन् चर्केर जाने देखिएकाले सरकार चिन्तित हुन थालेको छ।

अध्ययनमा ११ वर्षका २७ प्रतिशत र ११ वर्षका २४ प्रतिशत केटाहरू बढी नै मोटोपन छन्। १५ वर्षको उमेर पुगुञ्जेल मोटोपन भएका युवतीको प्रतिशत ४३ र युवा २९ प्रतिशत पुग्ने गरेको अध्ययनले देखाएको छ।

यस्तै स्वस्थकर खाजा खाने मामिलामा पनि बेलायती बालबालिका पुछारमा रहेका छन्। खासमा विद्यालयमा स्वस्थकर खाजा खुवाइए पनि त्यस्ता खाजातर्फ बालबालिकाको रुचि नभएर बाहिरी खाजामा ध्यान केन्द्रित गरेकाले पनि उनीहरूमा मोटोपन बढेको विश्लेषकहरू बताउँछन्।

विश्व स्वास्थ्य संगठनको युरोप निर्देशक डा. हान्स क्लज भन्छन्, ‘अचेलका केटाकेटीमा नियमित कसरत हुन छाडेको छ। उनीहरू नियमित शारीरिक अभ्यास नगर्ने, स्वस्थकर खाजा–खाना नखाने जस्ता कारणले उनीहरूको वजन दिनदिनै बढिरहेको छ। उनीहरूको स्वस्थकर जीवनशैली नभएका कारण उनीहरूलाई बढीभन्दा बढी सक्रिय बनाउनुपर्ने देखिएको छ।’

प्रकाशित: १५ जेष्ठ २०८१ ०६:४९ मंगलबार