मकवानपुर जिल्लाको विकट राक्सिराङ र कैलाश गाउँपालिकामा अवैध रूपमा लगाइएको गाँजा र अफिम खेतीलाई प्रहरीले नष्ट गरेको छ। 

गाँजा ४६ बिघा १६ कट्ठा जमिनमा र अफिम तीन बिघा पाँच कट्ठा जमिनमा लगाइएको जिल्ला प्रहरी कार्यालय मकवानपुरले जनाएको छ।

दुवै गाउँपालिकाको विभिन्न स्थानमा लगाइएको सो खेती नष्ट गरिएको हो। प्रत्येक वर्ष जस्तै यस वर्ष पनि लागू औषध खेती नष्ट गर्ने अभियान अन्तर्गत सो परिमाणमा गाँजा खेती र अफिम खेती नष्ट गरेको बताइएको छ। सो अभियान अन्तर्गत लगातार चार दिन लगाएर प्रहरीको विभिन्न संयुक्त टोलीले गाँजा र अफिम नष्ट गरेको थियो।

प्रहरी प्रधान कार्यालय लागू औषध नियन्त्रण ब्युरो  कोटेश्वरबाट खटेको प्रहरी निरीक्षक कञ्चन राजचलको नेतृत्वमा नौ, जिल्ला प्रहरी कार्यालय मकवानपुरका प्रहरी निरीक्षक बलराम श्रेष्ठको नेतृत्वमा ३८ तथा इलाका प्रहरी कार्यालय मनहरिका प्रहरी निरीक्षक कृष्णराज ढकालको नेतृत्वमा ३६ जना गरी ८३ जनाको प्रहरी टोलीले सो अवैध गाँजा तथा अफिम खेती नष्ट गरेको हो। भौगोलिक विकटता र यातायात असुविधाका कारण प्रहरी प्रशासनको पहुँच हुन नसक्ने भएकाले सो खेती त्यस क्षेत्रमा हुने गरेको छ। अझै धेरै बाँकी नै रहेको अनुमान रहेको छ।

प्रहरीले प्रत्येक वर्ष सो खेती नष्ट गर्ने अभियान चलाए पनि  गाँजा र अफिम खेती बन्द नभएको स्थानीयहरूको भनाइ छ। यता जिल्ला प्रहरी कार्यालय मकवानपुरका प्रहरी उपरीक्षक वामदेव गौतमले मकवानपुर जिल्लामा वर्षाैंदेखि हुँदै आएको गाँजा र अफिम खेती अभियान चलाएर नष्ट पार्ने बताए।

प्रकाशित: २ पुस २०७९ ०८:१६ शनिबार