मेची राजमार्गमा गरिएको यातायात बन्दले जनजीवन प्रभावित बनेको छ। बन्दका कारण राजमार्गमा लामो तथा छोटो दूरीका सवारी साधन चल्न सकेका छैनन्।
बन्दले इलाम, पाँचथर, ताप्लेजुङ र झापाको जनजीवन प्रभावित बनेको हो। ताप्लेजुङको पाथीभरा (मुक्कुम्लुङ) क्षेत्रमा केबुलकार बनाउन जंगल फँडानी गरिएको विषयलाई लिएर विभिन्न संगठन र समूहले बन्द आह्वान गरेका हुन्।
त्यस क्षेत्रमा याक्थुङ लिम्बूसहित आम मानिसको ‘आस्थाको केन्द्र’मा जबर्जस्त रूपमा रुख फँडानी गरी केबुलकार बनाउन लागिएको बन्दकर्ताले जनाएका छन्।
उनीहरूले मेची राजमार्गसहित तमोर करिडोर र ताप्लेजुङ क्षेत्रमा आज र भोलि (बुधबार र बिहीबार) बन्द आह्वान गरेका हुन्।
प्रकाशित: २ जेष्ठ २०८१ ०७:३१ बुधबार